Home QHT …Bir mən vardır məndə məndən içəri…

…Bir mən vardır məndə məndən içəri…

226
0

Türk xalqlarının görkəmli sənətkarlarından biri, İlahi eşqi tərənnüm edən ədəbiyyatın ilk, gözəl nümunələrini yaradan və təbliğ edən Yunis Əmrəyə görə insan əməlinə, gördüyü işlərinə görə ad qazanır. Yəqin ona görədir ki, bu günümüzdə də Yunus Əmrə şerlərinə dönə-dönə müraciət olunur, xatirəsi anılır.
Elə 5 may tarixində “Beynəlxalq Muğam Mərkəzində” Respublikanın Əməkdar artisti Nuriyyə Hüseynovanın rəhbərliyi ilə AMEA Folklor İnstitutunun “Qorqud” folklor ansamblının təqdimatında “Yunus Əmrə aşiqləri” adlı konsert proqramı da bu niyyətlə təşkil edildi. Tədbirdə AMEA-nın Folklor İnstitutunun direktoru, akademik Muxtar İmanov, Bakıdakı Yunus Əmrə İnstitutunun rəhbəri Selçuk Karakılıç, Milli Məclisin deputatı Qənirə Paşayeva görkəmli mütəfəkkir Yunus Əmrənin həyat və yaradıcılığından söz açdılar.
Əməkdar Artist Nuriyyə Hüseynova, bəstəkar-müğənni Çilənay Hüseynli, Həlimət Sultan, Ülviyyə Sədaqətin ifasında Yunus Əmrənin şerlərinə bəstələnmiş mahnılar, ibrətamiz və fəlsəfi sözlər səsləndirildi. Yunus Əmrə tədbirinə Türkiyədən məxsusi olaraq təşrif gətirmiş Orxan Çakmak Qarabağ Zəfərinə həsr etdiyi “Zəfər şərqisi”ni, Himnimizin müəllifi Əhməd Cavadın “Çırpınırdı Qara dəniz” mahnısını ifa etdi. Hər iki mahnı bütün iştirakçılar və tamaşaçılar tərəfindən ayaq üstə alqışlandı və birgə ifa edildi.
Konsertdə AzTV-nin redaktoru, “Beynəlxalq Əlillər Cəmiyyəti” İB İdarə Heyəti üzvü, “Turan Türk Xalqlarının Mədəniyyətinin İnkişafına Dəstək” İB-in sədri Zərnişan Azayeva Yunus Əmrə şerlərindən seçmələr təqdim etdi.
Konsertin əvvəlində nümayiş olunan Yunus Əmrənin həyat və yaradıcılığına həsr edilmiş qısametrajlı film Yunus Əmrəni tamaşaçılara daha yaxından tanıtdı.
Onu xüsusi qeyd edək ki, bu konsert-kompozisiya Anadolu Ərəni, Türk Dünyasının böyük şairi Yunus Əmrənin xatirəsinə layiq olaraq çox ciddi düşünülmüş, yüksək səviyyədə hazırlanmışdır.
Böyük Türk Dünyasının mədəni-mənəvi irsini, eləcə də dahilərimizi tanıdan, xatirəsinə yaşadan, təbliğ edən və gələcək nəsillərə, həmçinin dünyaya çatdırılması sarıdan belə yüksək səviyyəli tədbirlərə çox böyük ehtiyac olduğunu görür və bir tamaşaçı kimi tez-tez belə proqramların təşkil olunmasını gözləyirik.
“Beynəlxalq Muğam Mərkəzi”nin rəhbərliyinə bu möhtəşəm səhnəni təşkilatçılara təqdim etdiyinə və “Beynəlxalq Əlillər Cəmiyyəti” İB-in (BƏC İB) və “Türk Dünyası Turan Düşüncə Mərkəzi” İB-in 10 nəfər üzvünü də dəvət etdiyinə görə Sədr Tahir Xudiyev, üzvlər-“Azərbaycan Coriyo Kunq-Fu Federasiyası”nın prezidenti Davud Mahmudzadə və hüquqşünas Xatirə Azər qızı xüsusi təşəkkürlərini bildirdilər.

…Məni məndə demə, məndə deyiləm,
Bir mən vardır məndə, məndən içəri.
Süleyman quş dili bilir, dedilər,
Süleyman var, Süleymandan içəri…

Məlahət Abdullayeva


Previous articleİlham Əliyev Türkiyəyə gedir
Next articleİrəvanda mitinqlərin hədəfi: yeni taktika tətbiq edilir

LEAVE A REPLY

Please enter your comment!
Please enter your name here