Home Cəmiyyət Prezidentin sədr təyin etdiyi Seyidzadə kimdir? – Dosye

Prezidentin sədr təyin etdiyi Seyidzadə kimdir? – Dosye

304
0

Xəbər verdiyimiz kimi, Prezident İlham Əliyev Əsgər Əyyub oğlu Ələkbərovun “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri vəzifəsindən azad edilməsi barədə sərəncam imzalayıb. Dövlət başçısının digər qərarı ilə Şahin Kamil oğlu Seyidzadə “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri təyin edilib.

Sosialxəbər.az xəbər verir ki, Şahin Seyidzadə 15 aprel 1978-ci ildə Bakı şəhərində anadan olub. 1995-ci ildə akademik Azad Mirzəcanzadənin təşəbbüsü ilə yaradılmış Həbib bəy Mahmudbəyov adına Texniki-Humanitar Liseyi bitirib.

1999-cu ildə Azərbaycan Dövlət Pedaqoji Universitetinin bakalavr, 2001-ci ildə magistr pilləsini bitirib, 2006-ci ildə Azərbaycan Dövlət İqtisad Universitetinin “Menecment” ixtisası üzrə magistr dərəcəsi alıb.

2007-ci ildə Sosial və İqtisadi elmlər üzrə Moskva Ali Məktəbinin “Təhsilin təşkili və idarəetməsi” və İngiltərənin Mançester Universitetinin “Təhsilin təşkili və idarəetməsi ixtisası” üzrə magistr dərəcəsi alıb.

Hazırda Azərbaycan Dövlət Pedaqoji Universitetinin “Təhsilin təşkili və idarəetməsi” üzrə fəlsəfə doktorluğu üzrə dissertantıdır. İngilis və rus dillərində sərbəst danışa bilir.

Şahin Seyidzadə 1999-2005-ci illərdə Milli Debat Mərkəzinin direktoru, 2005-2007-ci illərdə İnsan Resursları Məktəbinin rəhbəri olub. 2006-2012-cı illərdə bir sıra özəl müəssisələrin rəhbəri vəzifələrində çalışıb.

2012-2016-cı illərdə Azərbaycan Respublikası Gənclər Təşkilatları Milli Şurasının sədri, 2012-2017-ci illərdə Azərbaycan Respublikasının Prezidenti yanında Gənclər Fondunun Müşahidə Şurasının üzvü olub.

2015-ci ildən Azərbaycan Respublikası Təhsil Nazirliyinin “SABAH qrupları”nın İcra Komitəsinin rəhbəri, 2019-cu ildən Azərbaycan Respublikası Sahibkarlar (İşəgötürənlər) Təşkilatları Milli Konfederasiyası “Gənc sahibkarlarla iş komissiyası”nın sədr müavini, 2019-cu ildən Heydər Əliyev Fondunun təşəbbüsü ilə “Regional İnkişaf” İctimai Birliyi tərəfindən həyata keçirilən “Sosial layihələr” müsabiqəsinin rəhbəri olub.

9 fevral 2020-ci ildə keçirilən növbədənkənar parlament seçkilərində 50 saylı Abşeron-Qobustan seçki dairəsi üzrə VI çağırış millət vəkili olaraq seçilib. Milli Məclisin Elm və Təhsil, həmçinin Gənclər və idman komitələrinin, “Ali təhsil haqqında” Azərbaycan Respublikası Qanunu layihəsinin hazırlanması məqsədi ilə yaradılmış İşçi Qrupunun, həmçinin Avropa Parlamenti ilə Əməkdaşlıq Komitəsinin üzvüdür.

Ailəlidir, iki övladı var.

Previous articleQarabağda daha 159 mina aşkarlandı
Next articleRusiya 2014-cü ildən işğal planını həyata keçirir – Baxçalı

LEAVE A REPLY

Please enter your comment!
Please enter your name here